ពិធីបិទវគ្គវិក្រឹត្យការគរុកោសល្យដល់គ្រូបង្គោលនៅតាមអង្គភាពជំនាញ នៃក្រសួងការងារ និងបណ្តុះបណ្តាលវិជ្ជាជីវៈ
នារសៀលថ្ងៃអង្គារ ៥រោច ខែបុស្ស ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៣០ ខែមករា ឆ្នាំ២០២៤ ឯកឧត្តម អុិន ខេមរា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតី ក្នុងពិធីបិទវគ្គវិក្រឹត្យការគរុកោសល្យដល់គ្រូបង្គោលនៅតាមអង្គភាពជំនាញ នៃក្រសួងការងារ និងបណ្តុះបណ្តាលវិជ្ជាជីវៈ នៅវិទ្យាស្ថានជាតិបណ្តុះបណ្តាលបច្ចេកទេស (NTTI)។
វគ្គវិក្រឹត្យការនេះ បានរៀបចំទ្បើងក្រោមកិច្ចសហការរវាងវិទ្យាស្ថានជាតិការងារ និងវិទ្យាស្ថានជាតិបណ្តុះបណ្តាលបច្ចេកទេស (NTTI) នៃក្រសួងការងារ និងបណ្តុះបណ្តាលវិជ្ជាជីវៈ ដែលមានរយ:ពេល១០ថ្ងៃ ចាប់ពីថ្ងៃទី១៧-៣០ ខែមករាឆ្នាំ២០២៤ និងមានសិក្ខាកាមសរុបចំនួន ៦២នាក់ ស្រី១៥នាក់ ក្នុងគោលបំណងបំប៉នចំណេះដឹងបន្ថែមផ្នែកគរុកោសល្យដល់សិក្ខាកាមដែលជាគ្រូបង្គោលនៅតាមអង្គភាពជំនាញ ឱ្យយល់កាន់តែស៊ីជម្រៅអំពីវិធីសាស្រ្តក្នុងការបង្រៀន និងសីលវិធីក្នុងការផ្ទេរចំណេះដឹងប្រកបដោយទេពកោសល្យ ភាពប៉ិនប្រសប់ និងវិជ្ជាជីវ:ច្បាស់លាស់។
វគ្គវិក្រឹត្យការបានផ្តោតសំខាន់លេីប្រធានបទចំនួន៥ ដូចជា: (១)វិធីសាស្ត្របង្រៀន និងកិច្ចតែងការបង្រៀន (២)ការអភិវឌ្ឍកម្មវិធីសិក្សា(៣)ការគ្រប់គ្រងការអប់រំ (៤) ការវាយតម្លៃការសិក្សា និង(៥)សីលធម៌វិជ្ជាជីវ:គ្រូបង្រៀន។ បន្ទាប់ពីនោះ សិក្ខាកាមបានធ្វេីតេស្តប្រឡងសមត្ថភាពអំពីការយល់ដឹងលេីប្រធានបទទាំងអស់ដែលបានរៀនរយ:ពេល១០ថ្ងៃនេះ។
ក្នុងឱកាសនេះ ឯកឧត្តមរដ្ឋលេខាធិការ បានថ្លែងអំណរគុណចំពោះ ឯកឧត្តមរដ្ឋមន្ត្រី ដែលតែងតែយកចិត្តទុកដាក់និងគាំទ្រដល់ការលេីកកម្ពស់សមត្ថភាពគ្រូបង្គោលនៃវិទ្យាស្ថានជាតិការងារ ក៏ដូចជាមន្ត្រីរាជការគ្រប់លំដាប់ថ្នាក់នៃក្រសួងការងារ និងបណ្តុះបណ្តាលវិជ្ជាជីវ: ដើម្បីបំពេញការងារកា
ន់តែល្អប្រសើរប្រកបដោយប្រសិទ្ធភាព និងបុរេសកម្ម។ ជាមួយគ្នានេះ ឯកឧត្តមបានផ្តល់អនុសាសន៍ និងមានមតិផ្តាំផ្ញេីមួយចំនួនដល់សិក្ខាកាមដូចខាងក្រោម÷
១.យកចំណេះដឹងដែលទទួលបានពីវគ្គវិក្រឹត្យការនេះ ជាមូលដ្ឋានសម្រាប់យកទៅអនុវត្តក្នុងការផ្ទេរចំណេះដឹងបន្ត ឱ្យមានប្រសិទ្ធភាពប្រសេីរឡេីង មួយកម្រិតបន្ថែមទៀត
២. រៀបចំកម្មវិធីបណ្តុះបណ្តាល និងតាក់តែងមេរៀនទៅតាមជំនាញនៃអង្គភាពនីមួយៗ សម្រាប់ត្រៀមធ្វេីការបណ្តុះបណ្តាលនៅពេលខាងមុខស្របទៅតាមកម្មវិធីបណ្តុះបណ្តាលរបស់វិទ្យាស្ថានជាតិការងារ
៣.យកចិត្តទុកដាក់ក្នុងការអនុវត្តកាតព្វកិច្ច តួនាទីភារកិច្ច និងគោរពវិន័យឱ្យបានត្រឹមត្រូវ និងខ្ជាប់ខ្ជួន ប្រកបដោយចំណេះ ជំនាញ ឥរិយាបថ និងក្រមសីលធម៌វិជ្ជាជីវ:ជាគ្រូបង្គោល១រូប
៤. បន្តធ្វេីបច្ចុប្បន្នភាពចំណេះដឹង ចំណេះធ្វេីរបស់ខ្លួនជាប្រចាំ
៥. ខិតខំអភិវឌ្ឍន៍សមត្ថភាពផ្ទាល់ខ្លួន និងបំពេញការងារឱ្យបានល្អ ក្នុងនាមជាអ្នកកសាងធនធានមូលធនមនុស្សក្នុងវិស័យការងារ ដេីម្បីចូលរួមចំណែកអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវ: ឱ្យកាន់តែរីកចម្រេីន។
វគ្គសិក្សានេះបានបញ្ចប់ដោយជោគជ័យជាមួយលទ្ធផលគួរជាទីមោទន:។
