នាយក

ស្វាគមន៍មកកាន់វិទ្យាស្ថានជាតិការងារ

 
វិទ្យាស្ថានជាតិការងារ (វ.ជ.ក) ត្រូវបានបង្កើតឡើងដោយអនុក្រឹត្យលេខ១១១ អនក្រ.បក ចុះថ្ងៃទី១ ខែសីហា ឆ្នាំ២០១៩ ស្តីពីការរៀបចំនិងការប្រព្រឹត្តទៅរបស់វិទ្យាស្ថានជាតិការងារ ដើម្បីផ្ដល់ការបណ្ដុះបណ្ដាល ពង្រឹង និងលើកកម្ពស់ចំណេះដឹងពេញមួយជីវិតពាក់ព័ន្ធនឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ជូនដល់មន្រ្ដីរាជការ អង្គការវិជ្ជាជីវៈ កម្មករនិយោជិត និយោជក សិស្ស និស្សិត និងសាធារណជន ប្រកបដោយវិជ្ជាជីវៈ គុណភាព ប្រសិទ្ធភាព និងរក្សាភាពសុខដុមរមនាក្នុងទំនាក់ទំនងវិជ្ជាជីវៈ។
 
ក្នុងការបំពេញបេសកកម្មរបស់ខ្លួនប្រកបដោយវិជ្ជាជីវៈ វិទ្យាស្ថានជាតិការងារបានរៀបចំកម្មវិធីបណ្តុះបណ្តាលប្រកបដោយភាពបទបែន និងឆ្លើយតបទៅនឹងតម្រូវការជាក់ស្តែងក្នុងការបំពេញមុខងារ និងភារកិច្ចរបស់ភាគីពាក់ព័ន្ធ។​ ឆ្លងកាត់បទពិសោធន៍នាពេលកន្លងមក យើងបានផ្តល់ការអប់រំប្រកបដោយគុណភាព ដោយរួមបញ្ចូលទាំងទ្រឹស្តីនិងការអនុវត្ត និងវិធីសាស្ត្រជាច្រើនដូចជាការលើកកម្ពស់ស្វ័យសិក្សា ការពិភាក្សាក្រុម សកម្មភាពជាក្រុម និងសកម្មភាពនានាដើម្បីពង្រឹងសមត្ថភាពក្នុងការគិតស៊ីជម្រៅ និងសមត្ថភាពក្នុងការអង្កេតនិងសិក្សាស្រាវជ្រាវ។
 
សាស្រ្តាចារ្យ និងគ្រូរបស់យើង គឺសុទ្ធសឹងជាអ្នកអនុវត្តច្បាប់ និងជាអ្នកស្រាវជ្រាវដែលមានបទពិសោធន៍ក្នុងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ដែលអាចផ្តល់ចំណេះដឹង និងចំណេះធ្វើពេញលេញដល់សិស្ស និសិ្សតប្រកបដោយប្រសិទ្ធិភាព។ សិស្ស និសិ្សតដែលទទួលបានការអប់រំនៅវិទ្យាស្ថានជាតិការងារ គឺមានសមត្ថភាពគ្រប់គ្រាន់ក្នុងការដោះស្រាយបញ្ហានានាពាក់ព័ន្ធនឹងវិស័យការងារ សន្តិសុខសង្គម​ និងបណ្តុះបណ្តាលវិជ្ជាជីវៈ ជាពិសេសយល់ច្បាស់អំពីបទប្បញ្ញត្តិច្បាប់ក្នុងវិស័យការងារ សន្តិសុខសង្គម​ និងបណ្តុះបណ្តាលវិជ្ជាជីវៈ។ ចំណេះដឹងដែលទទួលបានពីការអប់រំនៅវិទ្យាស្ថានជាតិការងារ គឺពិតជាមានសារៈសំខាន់ក្នុងការរួមចំណែកលើកកម្ពស់អនុលោមភាពតាមច្បាប់ ជាពិសេសលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈនៅក្នុងសហគ្រាស គ្រឹះស្ថាន។
 
ជាមួយនឹងការខិតខំប្រឹងប្រែងក្នុងការផ្តល់ការអប់រំប្រកបដោយគុណភាព វិទ្យាស្ថានជាតិការងារបានបង្កើតកិច្ចសហប្រតិបត្តិការជាមួយអង្គការអន្តរជាតិ និងគ្រឹះស្ថានអប់រំថ្នាក់ជាតិ និងអន្តរជាតិក្នុងនោះរួមមានវិទ្យាស្ថានបណ្តុះបណ្តាលវិស័យកាត់ដេរនៅកម្ពុជា (CGTI) គម្រោងរោងចក្រកាន់តែប្រសើរនៅកម្ពុជា (BFC) និងវិទ្យាស្ថានជាតិការងារនៃសាធារណៈរដ្ឋបារាំងនៅទីក្រុងលីយ៉ុង។
 
ជាមួយនឹងកិច្ចសហប្រតិបត្តិការនិងកម្មវិធីអប់រំប្រកបដោយភាពច្នៃប្រឌិត និងស្របតាមតម្រូវការនៃទីផ្សារការងារ សិស្ស និសិ្សត នឹងទទួលបានឱកាសការងារកាន់ច្រើនប្រកបដោយសមត្ថភាព និងភាពធន់។
 
ប្រសិនបើចង់ទទួលបានឯកទេសមួយច្បាស់លាស់ជាពិសេសច្បាប់ការងារ សេដ្ឋកិច្ចការងារ ទំនាក់ទំនងវិជ្ជាជីវៈ និងលក្ខខណ្ឌសុវត្ថិភាពនិងសុខភាពការងារ ការដោះស្រាយវិវាទការងារ ការគ្រប់គ្រងធនធានមនុស្ស និងមុខជំនាញផ្សេងទៀត វិទ្យាស្ថានជាតិការងារ គឺជាជម្រើសមួយដែលអ្នកសិក្សាអាចបំពេញបំណងរបស់ខ្លួនបាន។